Christine Steiner
Weui di kloane Miazal d`Muida goaraso vül sekiert hot is in Gotts Naom mit ia aufs Goisa Voiksfest gaonga.
Dais woa a muats Remasuri, oll´s hot durchanaonda g´schrian und glocht. D`Musi hot laut g´spült und va olle Seitn woa wos aondas zan hean.Owa recht schain is gwen und wos do ollas zan sehn gebm hot!
D`Muida is schao hundsmiad gwen van ewign Schaun und Renna, owa d`Miazal, dai hot nit gmui kriagn kainna.Spot is schao gwen, owa dai Kloane is nao in d`Vicha – Ausstöllung einigrollt.
Aussaturli schaine Viecha woan zan sehn, oas schaina ois s`aondare, owa waonnst oamoi so miad bist, daonn g`follt da da schainste Ochs nimma.
Auf oamoi schreit s`Miatzal: Muida, Muida g`schwind kim her!
Mei Gott, so a große Sau! Daß a so a muats Viech iwahaupt gibt.
Da gaonze Stoll woa ausgfüllt va dera Sau.Va ledi Fettn hots niedamoi
mehr schnaufa kainna. Und d`Miazal hot si goa nit gmui schaun kainna in dera Sau.
Auf oamoi locht`s und schreit`s: Muida schau, dai Sau is jo nao dicka ois du!
D`Leit dai umadum gstaondn san hom höllauf zan Locha aonghebt und d`Muida ward am liabstn in Erdbodn vasunga va ledi Geniern.
Sie reißt s`Miazal daonn van Stoll weg, haut ia a poar Watschn eini und sogt:
Du Frotz du goaschtiga, wia kaonn ma nia so grausli sein.Scham di, Lausmensch obscheulich`s.
Tuit ma sowos za da Muida sog`n?
Do hot s`Miazal fest zan blean aonghebt, daß sis nia so g`stessn hot: Bitt`di Muida, sei ma nit hab, bist eh du dicka ois dai Sau.