Mei(n) oida Huid
Franz Geissler
Waunn oana, sou wia ih, geehn reis‘n duid,
daunn braucht a in mei(n)‘ Göüta schou(n) oan Huid,
damit eahm d‘ Sun‘ nid d‘ Glåtz’n gaunz vabreïnnd,
weu sou vü Sun‘ is s‘ neamma g’weïhnd!
Und weu ma heia in Süd’n foohn hå(b)’m wui’n,
häd‘ ih ma an neich’n Huid kaffa sui’n,
zumindast waunn ‘s nuoch meina Frau gaunga wa‘!
Åwa ih håmma dëinkt, da oidi dou duid ’s ah!
Ea(r) is hiaz zwoa(r) schou(n) iwa 30 Joa(h)r in Kåst’n g’leïg’n,
åwa, ih såg ’s eïng, ih dui ah meine oid’n Såcha pfleïg’n!
Moudisch is a neamma, deïs håw‘ ih schou(n) begriffa,
åwa af d‘ Moudi håw‘ ih ålliweu schou(n) ‘pfiffa!
Sou sein ma zu d‘ Osta(r)‘n nouch Palma g’floug’n
und sein dua(r)t g’miadlich dua(r)ch d‘ Stråß’n zoug’n,
mid Wåssaflåsch’n und an Stådtplan in da Haund.
Au(n)zoug’n woa(r)‘ ma mid an scheïnan G’waund.
Ih mid ‘n Aunzug aus deï Siebz’ga-Joah(r),
obwui ih dåzumois a weïnga(r)l schlaunka woa(r),
und natia(r)lich mid mein‘ oid’n Huid,
weu, wisst’s eh, sou vü Sun duid ma nid guid!
Wia ma bam Haupteingaung voun da Basilika steïnga,
wou vüli Leid ei(n)- und außageïnga,
håw‘ ih, wia sa si ba oana Kiira g’hea(r)d,
in Huid in d‘ Haund g’numma, weul a‘ d‘ Aundåcht stea(r)d.
Daweul ih mi g’streïckt håb‘ und in d‘ Kiira einig’schaut,
håmma d‘ Gleiwich‘n a boa(r) Greiza in Huid einighaut.
Christlich, wia s‘ sein, hå(b)’m sa si meina daboa(r)md,
weu s‘ näimlich da Moanung woa(r)‘n, ih warad vöüllich vaoa(r)md!
zu den Texten