van trampolin owi
Feri Kopp
mia hom, bevoa s deis bod hom baut,
(i bin in mataschdoaf geboan)
deis wossa in da wulka gschtaut,
san midn sautroug schiffal gfoan.
mia san a in di kotnamüh.
in summa san duat olli hin.
deis bod woa kloan, di leit ouft z vü,
doch mit an echtn trampolin.
fia nid aniadn noch sein gschmockn,
wei s wossa braun und koid is gwein.
es woa a echti groudnlockn!
es houd hoid söm nix aoundaschts geim.
zeascht gschbüd im gatsch mit oana dousn,
ins wossa nocha, dreikig, pikat,
daoun schnö di nossi gatihousn
zan schluss am hoassn bleichdoch trikat.
da oidi kotna woa ma zwida.
houd ouft bäs gschaut und oiwei ghoacht,
wei i hob oamoi mit da frieda
van trampolin ins wossa gsoacht.
do houd a gschrian: "eis sad s zwoa schweine -
und tuits ma souwos jo nid mea!“
im wossa woa ma gounz alleine.
deis gaounze bod woa maenschnlea.
-------------
waoun d buim und i im freibod hockn,
dou foid ma ouft da kotna ein,
wei schdod da braunan groudnlockn
is wossa woam und sou schein rein.
ins wossa pinkln tui i nimma.
bin iwa sechzg, a oida maou.
am trampolin do deink i imma:
a bui sei wieda - mecht i schou.
kotnamüh: die Kadnar-Mühle in Mattersburg
gatihousn: gemeint ist eigentlich die schwarze Glatthose, aber da wollte der Reim nicht
zu den Texten