D'Reintn

Alfred Pinter

D'Resl Muam hout eitlichi Joha am Bugl, sie is scha recht old,
ban Geih brauchts zwoa Steicka dass nit vieri fold.
A kluani Reintn grieat’s, zan Steam z’fül und weinig zan Leim.
Sie is z’ friedn, wal seinda amul houts fia’d Oldn goa kua Reintn geim.
Imm amul klogts dass niama oawadn kau, nit z’braucha is af dera Wölt,
da Heagoud sul mie za iham neimma, ea dat a guits Weak, es wa nit g’föhlt.
Die Jungi muand: “Muida duits nit bittn drum,
wal steam miaß ma olli, owa erscht waun die Zeit is um."
Am ersten is Zohltog unduldi schaut d'Resl Muam die Gossn auf und oo,
wou bleibt dan niea da Brieaftroga sou laung, siest wora am dei Zeit läingst scha dou!
Es wiadn dou nix basieat sei? Eipa homs meha kua Göld in da Kassa drei?
A poa mul humplts hie zan Gossntiarl, schaut nou wana scha keimma duit,
eindli siachtsn va da Weidn, hiaz is z’friedn und olls is wieda guit.
Am Kuchltisch schauts in Brieaftroga genau zui wiera iha s'Göld viea zöhlt,
sie nimmt's in d'Haund, holts feist und is z'friedn mit da Wölt.
Sie gibt'n a nutz Tringöld, das a jo nit af sie vagisst,
waun am Erschtn wieda Zohltog is
Daun gib’st da Jungan s’Göld: “Nimms, du kaust is guit braucha, wos dat i damit mocha,
i brauch jo nix, s’ Eissn griari eeh, Gwaund how'i in Kostn vul, lauta unedigi Socha.”
Kamp is da Poustla fuat foungt’s zan jaman ou: “Oh Hea dou droum, lous da Zeit mit’n Stearm,
wal a poa mul mecht is nou daleim, daas da Brieaftroga kimmt und duit ma mei Reintn geim."

zu den Texten